• Black Facebook Icon
  • Black SoundCloud Icon
  • Black Bandcamp Icon
  • Black Instagram Icon

لستيفا “   اللى هى الدفاتر المتستفة يعني”  

قبل المجال ما يبقى روش والصوت يبقى رايق ونضيف ومترتب عشان يتباع، الموالد كانت ولسه جزء كبير  من ثقافة المصريين و هى الحاجة الوحيدة اللى كان الشارع (اللى هو المكان اللى الناس مبيدفعوش فيه تذاكر يعنى) بينزل يفرح فيها لحد ما اتنقل الصوت من الموالد للأفراح وكانت أول حاجه للتحول دا على حسب ما انا فاكر  وانا فى إبتدائى كانت مولد “يا طبيب” و “أبو أصاله- تلاتات تلاتات” وشعبان البغبغان” وناس تانية كتير ، كان النوع دا اسمه الموالد لحد ما الدنيا ساحت فى بعض و جه عمرو حاحا فى فرح وعمل حاجه اسمها “مهرجان العشرين” اللى مليان تحيات عشان النقطة وكدة “النقوط-اللى هو الفلوس اللى بتتاخد عشان آسم اللي بينقط يتقال فى الميكروفون” ودي كانت البدايه لأن الحاجه دي تاخد شكل عشان تتباع بيه واتبنى فكرة بيع “المهرجان”

ستديو ١٠٠ نسخة ،”بيع يا باشا” والعيال بقى بيضحك عليها وتسافر عشان يتنططوا قدام الأجانب وياخدوا فلوس ردش و الحدوتة بقت روشه وبتتباع ودخلت سكة الأفلام الرخيصة على إيد السبكى كمان “بيع يا باشا” آو حتى الفيديوهات النضيفة “بيع يا باشا”

بقول الكلام دا عشان الأجيال الجديدة اللى محضرتش الحوارات دى طالعة كلها بتعمل مهرجانات وحلمها تبقى زى “سادات وفيفتى” وتشتغل مع ١٠٠ نسخة وتطلع فى الأفلام زى محمد رمضان أو حتى فى فيديوهات العيال الروشة ف الأجيال دى طالعة ولا عارفة القصة ولا فاهمة أي حاجة ولسة مكملة، بقول دا عشان الصوت والصورة بتاعت “المهرجان-الموالد-مزيكا الشارع-أو المزيكا الشعبي- مزيكا الأفراح” أيا كان بتسموها إيه كان رايح فى سكة حقيقية من غير لعب من حد ولا بيع لكن الحدوته خدت سكة ما كانتش المفروض تاخدها عشان خاطر شوية فلوس تبيعوا بيها خربتوا الدنيا وبوظتوا ثقافة شارع وفشختوا أجيال جايه

دا اللى انا حضرتوا وكبرت عليه وفاكروا ومبتهمش حد لأن دا اللى حصل من غير هرى


رسالة لشوية الشراميط اللي موجودين وكل واحد عارف نفسه أو حتى اللى لسه هيبقوا موجودين

متذوقش الشارع فى صوت أو صورة أو فيديو عشان تبيعوا

البوم لستيفا

خدت ٨ تراكات “مهرجانات” معملونين فى آخر ٣ سنين وعدلتهم على حسب ما ودانى فاكرة مزيكا الموالد وصوت الأفراح اللى ببلاش والسماعات الخربانه اللى متغشلقة بيز


نقطة حقوق الملكية

ما بين المجال دا عمر ما كان فيه حاجة اسمها حقوق ملكية دا كان بيغنى أغانى دا وبيلعب لحن دا عشان كان ببلاش لكن دلوقتى لازم تشخلل عشان تتبسط

احلى مسا على اصحاب ال ٨ تراكات الأصليين

عمرو حاحا - شبرا الجنرال - عبدة سيطرة - عمرو مورا - طه انترناشونال - فلسطينى - مؤمن التربو - فيفا الدولى - محمود العوام - ميشو العويل - كمال عجوه - هشام الديفيل بركشن -المخترع فيجو - سادات العالمى - عمرو إيدو - اوشا - حناوى- حريف - المرعب شوبير

"LSTEFA" Cassette Tape

$10.00Price